យោងតាមឯកសារយល់ដឹងអំពីជំងឺទឹកនោមផ្អែមបានបង្ហាញថា មានឱសថជាច្រើនប្រភេទដែលប្រជាជននិយមយកមកប្រើប្រាស់ព្យាបាលជំងឺ ទឹកនោមផ្អែមដោយខ្លួនឯងតាមជំនឿតគ្នា ដែលភាគច្រើនជាឱសថមានជាតិល្វីងដូចជា ផ្លែម្រះ បណ្តូលពេច ត្រប់ខា ស្លឹកស្តៅ ជាដើម ។
ប៉ុន្តែក៏នៅមានឱសថមួយចំនួនទៀតដែលគ្មានរស់ជាតិល្វីង តែដោយមានការនិយាយតគ្នាអំពីបទពិសោធន៍ក្នុងការព្យាបាលមានប្រសិទ្ធភាពដូចជា ប្រទាលកន្ទុយក្រពើ ស្លឹកតើយ ខ្ទឹមស ខ្ទឹមបារាំង ស្លឹកត្របែក ដែលអ្នកវិទ្យាសាស្ត្រមួយចំនួនក៏ចាប់អារម្មណ៍ជាមួយនឹងឱសថប្រភេទនេះដែរ ហើយយកមកពិសោធន៍ដើម្បីឲ្យដឹងថា តើឱសថបុរាណទាំងនេះមានប្រសិទ្ធភាពកាត់បន្ថយកម្រិតជាតិស្ករបាន ពិតមែន ឬយ៉ាងណា ?
ខាងក្រោមនេះជាគន្លឹះពិសេសគួរយល់ដឹង ៖
១- លទ្ធផលនៃការពិសោធជាមួយសត្វឃើញថា មិនមានឥទ្ធិពលក្នុងការកាត់បន្ថយកម្រិតជាតិស្ករទេ តែបើយោងលើការសម្ភាសមានអ្នកជំងឺជាច្រើនអះអាងថា ព្យាបាលទឹកនោមផ្អែមបានដូចជា ពពួក Lagestroemig speciosa ឬពពួក Andrographis ជាដើម ។
២- ពិសោធន៍ជាមួយសត្វឃើញថា មានប្រសិទ្ធភាពកាត់បន្ថយជាតិស្ករពិតមែន តែត្រូវមានការពិសោធបន្តទៀតរហូតដល់គ្រប់ជ្រុងជ្រោយទើបអាចយកជាការបាន ។ ឱសថក្រុមនេះមាន ផ្លែម្រះ ស្លឹកបះ ខ្ទឹម និងស្លឹកត្របែក ។
៣- មានការពិសោធលើមនុស្សឃើញថា មានឥទ្ធិពលក្នុងការកាត់បន្ថយជាតិស្ករបានពិតមែន តែមិនទាន់ប្រាកដថាអាចប្រើជំនួសថ្នាំបច្ចុប្បន្នបាននោះទេ ។ ឪសថបុរាណក្រុមនេះមាន ប្រទាលកន្ទុយក្រពើ ខ្ទឹមបារាំង និងស្មៅពុកមាត់ឆ្មា ។
សរុបជារួមទៅ បច្ចុប្បន្ននេះនៅមិនទាន់មានឱសថបុរាណណាអាចយកមកប្រើជំនួសថ្នាំ បាននៅឡើងទេ ។ ប៉ុន្តែឱសថបុរាណទាំងនោះយើងកំពុងតែទទួលទានជារាងរាល់ថ្ងៃមានដូចជា ម្រះ ខ្ទឹមបារាំង គឺមិនមានផលប៉ះពាល់ដល់សុខភាពអ្វីឡើយ ។ ប៉ុន្តែលោកអ្នកមិនត្រូវបញ្ឈប់ការប្រើប្រាស់ថ្នាំពេទ្យជាដាច់ខាត ព្រោះប្រសិទ្ធភាពនៃការព្យាបាលតាមបែបឪសថបុរាណនៅមិនទាន់មានភាព ជឿរជាក់ឲ្យប្រាកដនៅឡើយទេ ៕
ប្រភព៖ KOHSANTEPHEAP